தலாக் சட்டங்கள்..

கணவன், மனைவியிடையே கருத்து வேறுபாடுகள் வந்து அது பெரும் பிரச்சனையாக உருவெடுக்கும்பொழுது விவாகரத்து என்ற முடிவுக்கு வருவது உலகில் உள்ள அனைத்துச் சமுதாய மக்களிடமும் கடைபிடிக்கப்படும் ஒரு பொதுவான நடைமுறையாகும். என்றாலும், முஸ்லிம்கள் செய்யும் விவாகரத்து மட்டும் இந்த நாட்டில் அதிகமாக விமர்சிக்கப்படுகிறது. அது பெண்களுக்கு இழைக்கப்படும் அநீதியாக பார்க்கப்படுகிறது.

இதற்கு காரணம் முஸ்லிம்களிடமே தலாக் சட்டங்கள் பற்றிய போதிய விழிப்புணர்வு இல்லாமை தான். 

இதனால் எடுத்த எடுப்பிலெல்லாம் தலாக் கூறி பெண்களுக்கு அநீதி இழைக்கும் நிலை இந்தச் சமுதாயத்தில் உருவாகி, தற்போது சங்பரிவார கும்பலின் தூண்டுதலால் உச்சநீதிமன்றம் இதில் தலையிடும் அளவுக்கு வந்துள்ளது.

நினைத்தவுடனே தலாக் சொல்லி மணமுறிவு செய்துகொள்வதையோ, பல வருடகால பந்தத்தை 'முத்தலாக்' என ஒரே வார்த்தையில் சில நொடிகளில்  முடித்துக் கொள்வதையோ இஸ்லாம் ஒருபோதும் அனுமதிக்கவில்லை...

கணவன் மனைவியிடையே மனக்கசப்புகள் ஏற்பட்டால் தலாக் என்ற நிலைக்கு வருவதற்கு முன் அவர்களிடையே இணைப்பை ஏற்ப்படுத்தும்  முயற்சியில் சில வழிகாட்டுதல்களை இஸ்லாம் வழங்கியுள்ளது. அவற்றை முறையாகக் கடைபிடித்தால் குடும்ப வாழ்வில் ஏற்படும் பிரச்சனைகள் சுமூகமாகத் தீர்க்கப்பட்டு, பெரும்பான்மையான மணமுறிவுகள் தவிர்க்கப்பட்டு விடும். மேலும், அந்த வழிகாட்டுதல்களை ஆய்வு செய்தால், விவாகரத்தைத் தவிர்த்து, நல்லிணக்கம் ஏற்படுத்தவே இஸ்லாம் விரும்புகிறது என்பதையும் அறிந்துக் கொள்ளலாம்.

ஈலாஃ :-

பொதுவாக விவாகரத்து என்ற பேச்சை எடுக்கும் அளவுக்கு கணவன், மனைவியிடையே பாரதூரமான பிரச்சனைகள் ஏற்பட்டு விட்டால், அவர்கள் முதலில் கடைபிடிக்க வேண்டிய வழிமுறை 'ஈலாஃ' என்பதாகும். அதாவது ஒருவரோடு ஒருவர் எந்த ஒட்டு உறவும் வைத்துக் கொள்ளாமல் சில காலங்களுக்குத் தற்காலிகமாகப் பிரிந்து இருப்பதாகும். அதிகபட்சமாக நான்கு மாதங்கள் மட்டுமே இதை கடைபிடிக்க இஸ்லாம் அனுமதிக்கின்றது. அதற்குமேல் அனுமதியில்லை.

தமது மனைவியருடன் கூடுவதில்லை என்று சத்தியம் செய்தோருக்கு நான்கு மாத அவகாசம் உள்ளது. அவர்கள் (சத்தியத்தை) திரும்பப் பெற்றால் அல்லாஹ் மன்னிப்பவன்; நிகரற்ற அன்புடையோன்.

(அல்குர்ஆன் 2:226)

நான்கு மாதங்களுக்கு மேல் ஒருவரையொருவர் காக்க வைக்க அனுமதியில்லை.. அதற்குள் சேர்வதா பிரிவதா என்ற முடிவுக்கு வந்துவிட வேண்டும் என்பது இதன் பொருள். சிலர் எந்த முடிவையும் எடுக்காமலேயே வருடக் கணக்கில் பிரிந்திருப்பர்.. அது தடுக்கப்பட்டுள்ளது.. 

நபிகள் நாயகம் அவர்கள் தங்கள் மனைவிமார்களோடு ஏற்பட்ட ஒரு பிரச்சனையில் ஒரு மாத காலம் ஈலாஃ இருப்பதாகக் கூறி, 29 நாட்கள் அதைக் கடைபிடித்து, மீண்டும் மனைவியரோடு இணைந்துக் கொண்டார்கள். (பார்க்க புகாரி 5201, 5202, 5203)

ஒரு மாதமோ, இரண்டு மாதமோ பேசமாட்டேன் என சத்தியம் செய்தவர் அந்த காலக்கெடுவை நிறைவு செய்ய வேண்டும் அவசியம் இல்லை.. இடையிலேயே மனம் மாறினால் இணைந்து கொள்ளலாம்..

கணவனோ, மனைவியோ இருவரில் யார் மீது தவறு இருக்கின்றதோ அதை அவர் உணர்ந்து, தன் தவறை திருத்திக் கொள்ள வாய்ப்பாக அந்த பிரிவு அமையும்..

இந்தத் தற்காலிகப் பிரிவே அவர்களுக்கு நிரந்தரப் பிரிவு எத்தகைய துயரம் என்பதை உணர்த்தக் கூடும்.

ஒரு மாதமோ, இரண்டு மாதமோ, அல்லது இறைவன் அதிகபட்சமாக அனுமதித்த நான்கு மாதம் வரையில் கூட பிரிந்து இருந்த பிறகும் அவர்களுக்கிடையில் நல்லிணக்கம் ஏற்படாவிட்டால் அடுத்து கடைபிடிக்கவேண்டிய வழிமுறைகள் என்னென்ன விரிவாக காணலாம். 

===================================================================

கீழ்படிதல் :

பெரும்பாலும் ஈலாஃ இருப்பதன் காலகட்டத்தில், தம்பதியர் தங்கள் தவறுகளை உணர்ந்து மீண்டும் இணைந்து வாழவே முன்வருவர். அப்படி முன்வராத பட்சத்தில் கணவன், கீழ்க்காணும் வழிமுறைகளைக் கடைபிடிக்க இஸ்லாம் கட்டளையிடுகிறது. 

பிணக்கு ஏற்படும் என்று (மனைவியர் விஷயத்தில்) நீங்கள் அஞ்சினால் அவர்களுக்கு அறிவுரை கூறுங்கள்! படுக்கைகளில் அவர்களை விலக்குங்கள்! அவர்களை (லேசாக) அடியுங்கள்! அவர்கள் உங்களுக்குக் கட்டுப்பட்டு விட்டால் அவர்களுக்கு எதிராக வேறு வழியைத் தேடாதீர்கள்! அல்லாஹ் உயர்ந்தவனாகவும், பெரியவனாகவும் இருக்கிறான்.
(அல்குர்ஆன் 4:34)

முதலாவதாக மனைவிக்கு, அவள் செய்த தவறுகளின் விபரீதத்தை உணர்த்தும் விதமாக நல்ல முறையில் உபதேசம் செய்ய வேண்டும்.
இந்த நேரத்தில், மனைவியும் கணவனுக்குக் கட்டுப்படுவதன் அவசியத்தை மார்க்க ரீதியாகச் சிந்திக்க கடமைப்பட்டிருக்கிறாள்.

சிலரை விட சிலரை அல்லாஹ் சிறப்பித்திருப்பதாலும், ஆண்கள் தமது பொருட்களைச் செலவிடுகிறார்கள் என்பதாலும் ஆண்கள், பெண்களை நிர்வாகம் செய்பவர்கள் ஆவர். கட்டுப்பட்டு நடப்போரும், அல்லாஹ்வின் பாதுகாவல் மூலம் மறைவானவற்றை (கற்பை) காத்துக் கொள்வோருமே நல்ல பெண்கள் . (அல்குர்ஆன் 4:34)

மேலும் கணவனுக்கு கட்டுப்படுதலை குறித்து நபிகளார் கூறும்போது,

"நான் ஒருவருக்கு ஸஜ்தா செய்ய (சிரம் பணிய) கட்டளையிடுபவனாக இருந்திருந்தால் பெண்ணை அவள் கணவனுக்கு ஸஜ்தா செய்யுமாறு கட்டளையிட்டிருப்பேன்” என்று கூறியுள்ளார்கள்..

அறிவிப்பவர்: அபூஹுரைரா (ரலி)
நூல்: திர்மிதீ 107

இதுபோன்ற மார்க்க கட்டளைகளை மனதில் நிறுத்தி பெண்களும் சற்று விட்டுக்கொடுத்துப் போனால் பிரச்சனையை முடிவுக்குக் கொண்டுவர முடியும்..

அறிவுரை செய்தும் கட்டுப்படாவிட்டால், அடுத்த கட்டமாக படுக்கையிலிருந்து தள்ளி வைப்பதன் மூலம் அவர்களைச் சிந்திக்கத் தூண்டவும், அதற்கும் கட்டுப்படாவிட்டால் இலேசாக அடிக்கவும் இஸ்லாம் அனுமதிக்கிறது.எனினும் முகத்தில் அடிக்கவோ, காயம் ஏற்படும்படி அடிக்கவோ கூடாது.

எந்தச் சந்தர்ப்பத்திலும் மனைவியின் முகத்தில் அடிப்பதையும், காயம் ஏற்படும்படி அடிப்பதையும் நபிகள் நாயகம் (ஸல்) அவர்கள் மிக வன்மையாகத் தடுத்துள்ளார்கள். (நூல்: புகாரி 1294, 1297)

குடும்ப பிரச்சனைகள் பெரிதாக உருவெடுக்கும்போது பலமாக படைக்கப்பட்டிருக்கும் ஆண்கள் பலவீனமான பெண்கள் மீது கைநீட்டுவது அவர்களையும் மீறி விரும்பியோ விரும்பாமலோ நடந்துவிடும்..அதுபோன்ற சூழல்களில், சில ஆண்கள் கோபத்தில் வரம்பு மீறி மனைவியை அடிப்பதைத் தடுக்கவே இலேசாக அடிக்க மட்டும் அனுமதிக்கிறது மார்க்கம். அதுவும் அவர்களுக்குத் தவறை உணர்த்தி சேர்ந்து வாழ்வதற்காகவே தவிர விரட்டும் நோக்கில் அல்ல...

இந்த நடவடிக்கைகளுக்குப் பிறகு மனைவி கணவனுக்கு கட்டுப்பட்டுவிட்டால் அவர்களுக்கு எதிராக வேறு எதையும் செய்யக்கூடாது. தவறை உணர்ந்து கட்டுப்பட்ட பிறகு மென்மேலும் அவர்களைக் குத்திக்காட்டி பிரச்சனையை மீண்டும் வளர்க்கக் கூடாது, மனைவியிடம் நல்லிணக்கத்தையே நாடவேண்டும், இறைவனே உயர்ந்தவனாக இருக்கிறான் என இறுதியாக அவ்வசனம் கூறுகிறது..

இவ்வளவு செய்த பிறகும் நல்லிணக்கம் ஏற்படவில்லை என்றால், அப்பொழுதும் கூட உடனே தலாக் என்ற பேச்சை எடுக்க ஆண்களுக்கு இஸ்லாம் அனுமதி வழங்கவேயில்லை. குடும்பத்திலுள்ள மூத்த உறுப்பினர்கள், பிரச்சனையைச் சுமூகமாக அணுகி, கணவன் மனைவியரிடையே நல்லிணக்கம் ஏற்படுத்த சில வழிமுறைகளை இஸ்லாம் அறிவுறுத்துகிறது.

நேர்மையான நடுவர்கள் ..

. 

சம்பந்தப்பட்ட தம்பதியர் எவ்வளவுதான் தங்களுக்குள் நடக்கும் பிரச்சனைகளை வெளியே சொல்லாமல் மறைக்க நினைத்தாலும், அவர்களின் நடத்தையிலேயே குடும்பத்தார்கள் அறிந்துகொள்வார்கள். இருவரும் பிரியமாக தான் இருக்கிறார்களா இல்லையா என்பதை சில சூழ்நிலைகளே பெரியவர்களுக்கு காட்டித்தந்துவிடும்..

இதுபோன்ற சூழல்களில் குடும்ப பெரியோர்கள் தலையிட்டு விசாரிப்பது அவசியமாகும், அதற்கு சில வழிமுறைகளையும் இஸ்லாம் சொல்லித்தருகிறது..

அவ்விருவரிடையே பிளவு ஏற்படும் என்று நீங்கள் அஞ்சினால் அவன் குடும்பத்தின் சார்பில் ஒரு நடுவரையும், அவள் குடும்பத்தின் சார்பில் ஒரு நடுவரையும் அனுப்புங்கள்! அவ்விருவரும் நல்லிணக்கத்தை விரும்பினால் அல்லாஹ் அவ்விருவருக்கிடையே இணக்கத்தை ஏற்படுத்துவான். அல்லாஹ் அறிந்தவனாகவும், நன்றாகவே அறிந்தவனாகவும் இருக்கிறான்.

அல்குர்ஆன் 4:35

இருவருக்கு மத்தியில் தீர்க்கமுடியாத பிரச்சனைகள் இருக்கிறது என்று தெரிந்தால் பெண் வீட்டார் தரப்பிலிருந்து ஒரு நடுவரையும், கணவன் தரப்பிலிருந்து ஒரு நடுவரையும் நியமித்து, பிரச்சனை தொடர்பாக பேச வேண்டும் என்று மேற்கண்ட வசனம் கூறுகிறது..இதை அந்த கணவனே முன்வந்து செய்ய வேண்டும்.. இறைவனின் கட்டளையான இவற்றையெல்லாம் கடைபிடிக்காமல் உதறித் தள்ளிவிட்டு, எடுத்தவுடனே தலாக் செய்ய தயாராவது அநீதியாகும்..உங்கள் பொறுப்பில் ஒப்படைக்கப்பட்ட மனைவியின் விஷயத்தில் அநீதி இழைத்தால் அதுகுறித்து மறுமையில் விசாரிக்கப்படுவீர்கள் என்பதை நினைவில்க் கொள்ளுங்கள்..

ஆண்மக(னான குடும்பத் தலைவ)னும் தன் மனைவி மக்களின் பொறுப்பாளன் ஆவான். பெண் (மனைவி), தன் கணவனின் வீட்டுக்கும் அவனுடைய குழந்தைகளுக்கும் பொறுப்பாளியாவாள். ஆக, நீங்கள் ஒவ்வொருவரும் பொறுப்பாளரே. நீங்கள் ஒவ்வொருவரும் தத்தம் பொறுப்பு குறித்து விசாரிக்கப்படுவீர்கள் என நபிகள் நாயகம் (ஸல்) அவர்கள் கூறியுள்ளார்கள்...
.
அப்துல்லாஹ் இப்னு உமர்(ரலி)
புகாரி 5200.

பிரச்சனையில் சம்பந்தப்பட்ட இருவர் மட்டுமே பேசிக்கொண்டிருந்தால் பிரச்சனை பெரும்பாலும் முற்றிக்கொண்டே செல்வதற்கும் வாய்ப்புண்டு. அவர்களுக்கு மத்தியில் நீதமாக தீர்ப்பு வழங்க நடுவர்கள் இருந்தால் எத்தகைய பிரச்சனையையும் சுலபமாக தீர்க்க முடியும்..

நியமிக்கப்படக் கூடிய நடுவர்கள் இதில் நீதமாகவும், அறிவுப்பூர்வமாகவும் நடந்துகொள்ள வேண்டும் பிரிந்த . இருவருக்கிடையில் பொய்சொல்லியாவது நல்லிணக்கம் செய்துவைக்க மார்க்கம் அனுமதி வழங்கியுள்ளது என்பதுபோன்ற சட்டங்களை அறிந்து நுண்ணறிவுத் திறனுடன் செயல்பட வேண்டும்.சிறியளவிலான பிரச்சனையாக இருக்கும்பட்சத்தில்,.பெரியோர்கள் பேசுவது மூலம் எத்தனையோ மணமுறிவுகள் தவிர்க்கப்பட்டுள்ளது என்பது நடைமுறை உண்மை.

இல்லை..தீர ஆராய்ந்த பிறகும் அவர்கள் பிரிவது தான் நல்லது என அந்த நடுவர்களும் முடிவெடுக்கும் அளவுக்கு பிரச்சனைகள் இருந்தால் வேறுவழியே இல்லை.. சில விதிமுறைகளுடன் ஆணுக்கு தலாக் செய்யும் அனுமதியை இஸ்லாம் அளிக்கின்றது..

அந்த விதிமுறைகளில் முக்கியமான "இரண்டு சாட்சிகள்" முன்பு வைத்துதான் தலாக் சொல்ல வேண்டும்.. சாட்சிகள் முன்வைத்து சொல்ல வேண்டும் என்றாலே ஒரு சபையில்தான் சொல்ல வேண்டும் என்றாகிவிடுகின்றது.. இன்று குறுந்தகவல்களிலும், தொலைபேசியிலும் தலாக் சொல்பவனெல்லாம் எவ்வளவு பெரிய மார்க்க விரோத காரியத்தையும் மடத்தனத்தையும் செய்கிறான் என்பதை இதிலிருந்து புரிந்துகொள்ளலாம்..

இவ்வளவு சட்டதிட்டங்களை கடந்துதான் தலாக் என்ற முதல் அமர்வுக்கே வரச்சொல்கிறது இஸ்லாம்.. இவற்றில் எதையும் மக்கள் அறியாமலேயே அவசரப்படுவது வேதனைக்குரிய விஷயம்.. மார்க்க அறிஞர்களும் இதில் அதிக அலட்சியம் காட்டி வருகின்றனர்..

மேலும் இதுபோன்ற சூழல்களில்தான் தூய்மையான மனைவியாக இருந்தாலும் அவர்களின் ஒழுக்கத்தில் அவதூறு சுமத்தி திட்டமிட்டே மணமுறிவு செய்யும் அவலங்களும் சில இடங்களில் அரங்கேறுகின்றது.. அதை எப்படி தீர்க்க வேண்டும் என்ற சட்டத்தையும் இந்த ஜமாத்தார்களோ, ஆலிம்களோ இந்த அமர்வில் கடைபிடிப்பதில்லை..

இரண்டு சாட்சிகள் :

.

தலாக் அமர்வுக்கு வந்தபின் முதலில் கவனிக்க வேண்டியது இரண்டு சாட்சிகள் ஆகும்...

உங்களில் நேர்மையான இருவரை சாட்சிகளாக ஏற்படுத்திக் கொள்ளுங்கள்! அல்லாஹ்வுக்காக சாட்சியத்தை நிலைநாட்டுங்கள்!

திருக்குர்ஆன் 65:2

பொதுவாக சாட்சிகளாக இருக்கக்கூடியவர்கள் அநீதியான ஒப்பந்தங்களுக்கு துணைப்போகக் கூடாது என இஸ்லாம் தடுத்துள்ளது.(பார்க்க :நூல் முஸ்லிம் 3330 ) எனவே தலாக்கிற்கு சாட்சியாக செல்லக்கூடியவர்கள் நியாயமான காரணங்களுக்காக தான் தலாக் சொல்லப்படுகிறதா என்பதை அறிந்துகொள்ள வேண்டும்.. அற்ப காரணங்களுக்காக சொல்லப்படும் விவாகரத்துகள் அநீதியாகும்..அதற்கு துணை போகக் கூடாது..

சாப அழைப்பு :

மனைவியின் ஒழுக்கத்தில் கலங்கம் சொல்லும் விதத்தில் பாரதூரமான குற்றச்சாட்டுகள் கணவனால் வைக்கப்பட்டால் அதற்கு சாட்சிகள் உண்டா என கேட்டறிந்து கொள்வது அவசியம்.. வேறு சாட்சிகள் இல்லாமல் மனைவியின் மானக்கேடான செயலை, கனவனே கண்ணால் பார்த்ததாக கூறினால் சாப அழைப்பு பிரமானம் செய்யச் சொல்ல வேண்டும்..

இப்னு அப்பாஸ்(ரலி) அறிவித்தார்.

ஹிலால் இப்னு உமய்யா (ரலி) தம் மனைவியை ஷரீக் இப்னு சஹ்மாவுடன் இணைத்து விபசாரக் குற்றம் சாட்டினார். நபி(ஸல்) அவர்கள், 'ஆதாரம் கொண்டுவா! இல்லையென்றால் (அவதூறு செய்ததற்கு தண்டனையாக) உன் முதுகில் கசையடி தரப்படும்' என்று கூறினார்கள். அதற்கு அவர்கள், 'இறைத்தூதர் அவர்களே! எங்களில் ஒருவர், தன் மனைவியின் மேல் ஒரு மனிதரைப் பார்த்தாலும் ஆதாரம் தேடிச் செல்ல வேண்டுமா?' என்று கேட்க, நபி(ஸல்) அவர்கள், 'ஆதாரம் கொண்டு வா! இல்லையென்றால் உன் முதுகில் கசையடி தரப்படும்' என்று மீண்டும் கூறினார்கள்.
அறிவிப்பாளர் கூறுகிறார்: .

புகாரி 2671

ஸஹ்ல் இப்னு ஸஅத்(ரலி) அறிவித்தார்..

இறைத்தூதர்(ஸல்) அவர்களிடம் ஒருவர் வந்து, 'இறைத்தூதர் அவர்களே! தன் மனைவியுடன் வேறோர் ஆடவனைக் கண்ட ஒரு மனிதன் அவனைக் கொன்றுவிடலாமா? (அப்படிக் கொன்றுவிட்டால், பழிக்குப் பழியாக) அவனை நீங்கள் கொன்றுவிடுவீர்களா? அல்லது அவன் வேறு என்ன செய்யவேண்டும்?' என்று கேட்டார். அப்போது அல்லாஹ் அந்தக் கணவன் மனைவி தொடர்பாகக் குர்ஆனில் தான் கூறியுள்ள 'லிஆன்' எனும் சாப அழைப்புப் பிரமாணச் சட்டத்தை அருளினான். அப்போது இறைத்தூதர்(ஸல்) அவர்கள் அம்மனிதரிடம், 'உம்முடைய விஷயத்திலும், உம்முடைய மனைவி விஷயத்திலும் தீர்ப்பளிக்கப்பட்டுவிட்டது' என்று கூறினார்கள். பிறகு அந்த (கணவன், மனைவி) இருவரும் 'லிஆன்' செய்தார்கள். அப்போது நான் இறைத்தூதர்(ஸல்) அவர்களுடன் இருந்தேன். அந்த மனிதர் தம் மனைவியிடமிருந்து பிரிந்துவிட்டார். (அன்றிலிருந்து) அந்த நிகழ்ச்சியே 'லிஆன்' செய்யும் கணவன் மனைவியரைப் பிரித்து வைப்பதற்கு முன்மாதிரியாகிவிட்டது.

புகாரி : 4746

முதல் ஹதீஸில் ஹிலால் இப்னு உமையா (ரலி) அவர்கள் தம் மனைவி மீது விபச்சார குற்றம் சுமத்துகிறார்.. அதற்கு நபிகளார் ஆதாரம் கொண்டு வா இல்லையேல் அவதூறு சுமத்திய தண்டனையாக கசையடி கொடுக்கப்படும் என்கிறார்கள்.. இரண்டாவது ஹதீஸில் அதே ஸஹாபி மீண்டும் வந்து அதையே கேட்கும்போது உம் விஷயத்தில் இறை வசனம் அருளப்பட்டுவிட்டது என்று கூறி கீழ்காணும் இறைச்சட்டத்தின் அடிப்படையில் இருவரையும் லிஆன் செய்யச் சொல்கிறார்கள்..
---------------
தங்களைத் தவிர வேறு சாட்சிகள் இல்லாத நிலையில் தமது மனைவியர் மீது பழி சுமத்துவோர், தாங்கள் உண்மையாளர்கள் என்று அல்லாஹ்வின் மீது நான்கு தடவை (சத்தியம் செய்து) சாட்சியமளிக்க வேண்டும்.

தான் பொய்யனாக இருந்தால் தன் மீது அல்லாஹ்வின் சாபம் ஏற்படட்டும் என்பது ஐந்தாவதாகும். அவனே பொய்யன்'' என்று அல்லாஹ்வின் மீது நான்கு தடவை (சத்தியம் செய்து) அப்பெண் சாட்சியமளிப்பது தண்டனையிலிருந்து அவளைக் காக்கும்.

"அவன் உண்மையாளனாக இருந்தால் என்மீது அல்லாஹ்வின் கோபம் ஏற்படட்டும்'' என்பது ஐந்தாவதாகும்.

திருக்குர்ஆன் 24:6, 7, 8, 9
.---------------------

மனைவிமீது குற்றம் சுமத்தும் கணவன் அவனை தவிர வேறு சாட்சி இல்லாவிட்டால், அல்லாஹ்வின் மீது ஆணையாக நான் சொல்வது உண்மையே என்று நான்கு முறை சத்தியம் செய்து, நான் பொய்யனாக இருந்தால் என்மீது அல்லாஹ்வின் சாபம் உண்டாகட்டும் என்று ஐந்தாவது முறை சாபத்தை கேட்க வேண்டும்..

அதேபோல் குற்றம் சுமத்தப்பட்ட பெண் அதை மறுத்தால் அல்லாஹ்வின் மீது ஆணையாக அவன் சொல்வது பொய் என்று நாங்கு முறை சத்தியம் செய்து, அவன் உண்மையாளனாக இருந்தால் என்மீது அல்லாஹ்வின் சாபம் உண்டாகட்டும் என்று ஐந்தாவதாக சாபத்தை கேட்க வேண்டும்.

பள்ளிவாசல் நிர்வாக கவனத்திற்கு வரும் தலாக் வழக்குகளில் இவை அவசியம் கடைபிடிக்கப்பட வேண்டும்...தலாக் வழக்குகள் வரும்பொழுது தலாக்கிற்கு முன் கடைபிடிக்க வேண்டிய ஈலா போன்ற அனைத்தும் கடைபிடித்தார்களா? உறவுகளை நடுவராக வைத்து பேசினார்களா ? சாட்சிகளுக்குரிய பொறுப்புகள் என்னென்ன என்பது போன்ற விஷயங்களையும் விசாரித்து, அப்படியில்லையென்றால் கணவனுக்கு மேற்சொன்ன மார்க்க வழிகாட்டல்களை ஆலோசனையாக வழங்கி அனுப்ப வேண்டும்..

இவை அனைத்தும் கடைபிடிக்கப்பட்டுவிட்டன என்று தெரிந்தால் மட்டுமே விசாரணைக்கே எடுக்க வேண்டும்.. நிர்வாகத்தில் உள்ளவர்களுக்கே பெரும்பாலும் இதுபோன்ற சட்டதிட்டங்கள் தெரியாமல்தான் இருக்கின்றது..

தலாக் செய்யப்படும் பெண் அந்த நேரத்தில் தூய்மையான நிலையில் இருக்க வேண்டும்.அதாவது 

மாதவிலக்கு காலத்தில் தலாக் சொல்லக்கூடாது :

நான் என் மனைவியை, அவள் மாதவிடாயிலிருந்தபோது தலாக் சொல்லிவிட்டேன். ஆகவே, (என் தந்தை) உமர் (ரலி) அவர்கள் இதைப் பற்றி அல்லாஹ்வின் தூதர் (ஸல்) அவர்களிடம் கேட்டார்கள். அப்போது அல்லாஹ்வின் தூதர் (ஸல்) அவர்கள் (என் தந்தையிடம்) "உங்கள் புதல்வருக்குக் கட்டளையிடுங்கள்; அவர் தம் மனைவியைத் திரும்ப அழைத்துக் கொள்ளட்டும்! அவள் மாதவிடாயிலிருந்து தூய்மையடைந்து, பிறகு இரண்டாவது மாதவிடாய் ஏற்பட்டுப் பிறகு அதிலிருந்தும் தூய்மையடையட்டும்! பின்னர் அவர் (விரும்பினால்) தலாக் சொல்லிக்கொள்ளட்டும். அல்லது தம்மிடம் (மனைவியாக) வைத்துக்கொள்ளட்டும்!" என்று சொன்னார்கள்.

அப்துல்லாஹ் பின் உமர் (ரலி)
முஸ்லிம் 2923

மாதவிலக்கு நேரத்தில் தலாக் சொல்லப்பட்டால் மனைவியை திரும்ப மீட்டிக்கொண்டு அந்த மாதவிலக்கு முடிந்து அடுத்த மாதவிடாய் வந்து தூய்மையான பிறகு தான் தலாக் செய்ய எண்ணமிருந்தால் செய்ய வேண்டும்.இந்த இடைப்பட்ட காலத்திலாவது இருவருக்கு மத்தியில் நல்லிணக்கம் ஏற்படுவதை எதிர்பார்த்தே இஸ்லாம் இத்தகைய கட்டுப்பாடுகளை விதித்துள்ளது.. மேலும் மாதவிலக்கு நேரத்தில் பெண்கள் இயல்புக்கு மீறிய எரிச்சலை வெளிப்படுத்தக் கூடியவர்களாக இருப்பார்கள்..அதுபோன்ற நேரத்தில் கணவன் எடுக்கும் எதிர்வினை அவசரத்தால் எடுத்ததாகக்கூட இருக்கலாம் என்பதை கருத்தில் கொள்ள வேண்டும்..

தலாக்கிற்கு இரண்டு சாட்சிகளை ஏற்ப்படுத்திக் கொள்ள வேண்டும் என்பதை முன்பே சொல்லியிருந்தோம்.. அவர்கள் இதுபோன்ற விஷயங்களை தெளிவுபடுத்திக்கொண்டுதான் சாட்சியமளிக்க சம்மதிக்க வேண்டும்..

தலாக் :-

தலாக் என்ற அனுமதியை மூன்றுமுறை பயன்படுத்த ஆணுக்கு இஸ்லாம் அனுமதியிளித்துள்ளது. இந்த மும்முறையை எப்படி பயன்படுத்த வேண்டும் என்பதில்தான் இந்த சமுதாயம் குழம்பித் திரிகிறது..மும்முறை என்றால் வாழ்நாளிலேயே மும்முறை என்றுதான் அர்த்தம்.. ஒரே நேரத்தில் தலாக் தலாக் தலாக் என சொல்வது மும்முறை ஆகாது..அது ஒரு முறையாகதான் மார்க்கத்தில் கருதப்படும்..

தலாக்கை முதல் இரண்டு முறை பயன்படுத்துவதற்கும், மூன்றாவது முறை பயன்படுத்துவதற்கும் பெரும் வித்தியாசம் உள்ளது..அது என்ன என்பதை இப்போது காண்போம்..

மனைவியை நோக்கி தலாக் அல்லது நான் உன்னை விவாகரத்து செய்கிறேன் என்று சொல்லிவிட்டால் மூன்று வாய்ப்புகளில் முதல் வாய்ப்பை கணவன் பயன்படுத்திவிட்டார்..தலாக் என்று சொன்னவுடனேயே இருவருக்கும் மத்தியிலுள்ள பந்தம் முடிந்துவிடாது...தலாக் சொன்ன பிறகும்கூட மூன்று மாதவிடாய் காலம் மனைவி தன் கணவனுடைய வீட்டில்தான் இருக்க வேண்டும்..

நபியே! பெண்களை நீங்கள் விவாகரத்துச் செய்தால் அவர்கள் இத்தாவைக் கடைப்பிடிப்பதற்கேற்ப விவாகரத்துச் செய்யுங்கள்! இத்தாவைக் கணக்கிட்டுக் கொள்ளுங்கள்! உங்கள் இறைவனாகிய அல்லாஹ்வை அஞ்சுங்கள்! பகிரங்கமான வெட்கக்கேடான காரியத்தை அப்பெண்கள் செய்தாலே தவிர அவர்களை அவர்களின் வீடுகளிலிருந்து வெளியேற்றாதீர்கள்! அவர்களும் வெளியேற வேண்டாம். இவை அல்லாஹ்வின் வரம்புகள். அல்லாஹ்வின் வரம்புகளை மீறுபவர் தமக்கே தீங்கு இழைத்துக் கொண்டார். இதன் பிறகு அல்லாஹ் ஒரு கட்டளை பிறப்பிக்கக் கூடும் என்பதை நீர் அறிய மாட்டீர்.

அவர்கள் தமக்குரிய தவணையை அடையும்போது அவர்களை நல்ல முறையில் தடுத்து வைத்துக் கொள்ளுங்கள்! அல்லது நல்ல முறையில் அவர்களைப் பிரிந்து விடுங்கள்! உங்களில் நேர்மையான இருவரை சாட்சிகளாக ஏற்படுத்திக் கொள்ளுங்கள்! அல்லாஹ்வுக்காக சாட்சியத்தை நிலைநாட்டுங்கள்! அல்லாஹ்வையும், இறுதி நாளையும் நம்புவோருக்கு இவ்வாறே அறிவுரை கூறப்படுகிறது. அல்லாஹ்வை அஞ்சுவோருக்கு அவன் ஒரு போக்கிடத்தை ஏற்படுத்துவான்.

திருக்குர்ஆன் 65:1,2

உங்கள் பெண்களில் மாதவிடாய் அற்றுப்போனவர்கள் விஷயத்தில் நீங்கள் சந்தேகப்பட்டால் அவர்களுக்கும், மாதவிடாய் ஏற்படாதோருக்கும் உரிய இத்தா (எனும் காலக்கெடு) மூன்று மாதங்கள் ஆகும். கர்ப்பிணிகளின் காலக்கெடு அவர்கள் பிரசவிப்பதாகும். அல்லாஹ்வை அஞ்சுவோருக்கு அவரது காரியத்தை அவன் எளிதாக்குவான்.

திருக்குர்ஆன் 65:4

தலாக் சொன்ன பிறகும் மனைவி இத்தா முடியும் வரை கணவன் வீட்டில்தான் இருக்க வேண்டும். அவளை வெளியேற்றக்கூடாது, அவளும் வெளியேறக்கூடாது என்று மேற்கண்ட வசனங்கள் சொல்கிறது..

அந்த மூன்று மாதவிடாய் காலங்களுக்குள் இருவரும் சேர விரும்பினால் அப்படியே சேர்ந்துகொள்ளலாம்..எந்தவித திருமண ஒப்பந்தமும் செய்யத் தேவையில்லை..மூன்று மாதவிடாய்கள் கழிந்துவிட்டால் இருவரும் கணவன் மனைவி இல்லையென்று ஆகிவிடும்..இதன்பிறகு சேர விரும்பினால் திருமணம் செய்து சேர்ந்து கொள்ளலாம்..அனால் ஒரு தலாக்கை கணவன் பயன்படுத்திவிட்டார் என்பதில் மாற்றமில்லை..

ஒரு தலாக் செய்த பிறகு மீண்டும் சேர்ந்துவாழும் காலங்களில் மீண்டும் பிரச்சனைகள் வந்து முன்சொன்ன அனைத்து வழிமுறைகளும் கடைபிடிக்கப்பட்டு மீண்டும் பிரிய நாடினால் இரண்டாவது தலாக் பயன்படுத்தப்படும்..

இரண்டாவது தலாக்கிற்கு பிறகும் மேற்சொன்ன அதே சட்டங்கள் தான்..தலாக் சொன்னபிறகு மூன்று மாதவிடாய் காலங்கள் மனைவி கணவன் வீட்டிலேயே இருக்க வேண்டும்.. அந்த காலக்கெடுவுக்குள் சேர்ந்துகொள்ள நாடினால் அப்படியே சேர்ந்துகொள்ளலாம்.. பிரிய நாடினால் மூன்று மாதம் கழித்து பிரிந்து கொள்ளலாம்.. மூன்று மாதங்கள் கழித்த பின்னர் சேர நாடினால் திருமணம் செய்து சேர வேண்டும்..

எனினும் இரண்டு தலாக்குகள் பயன்ப்படுத்தப்பட்டதாகிவிட்டது.. இரண்டு தலாக்குகளும் பயன்ப்படுத்தப்பட்ட பின்னர், மீண்டும் அவர்கள் சேர்ந்து வாழ ஆரம்பித்த காலங்களில் பிரச்சனைகள் வந்து மீண்டும் பிரிய நாடினால் மூன்றாவது தலாக் பயன்ப்படுத்தப்படும்.. மூன்றாவது தலாக்கும் சொல்லப்பட்ட பின்னர் இருவரும் சேர நாடினால் தான் உடனே சேர முடியாது.அந்த பெண்ணை வேறொருவன் மணமுடித்து அவனும் தலாக் விட்டால்தான் பழைய கணவனை அவள் மணமுடிக்க முடியும்.இவை அனைத்தையும் கீழ்க்காணும் வசனங்களில் இறைவன் விவரிக்கின்றான்..

இவ்வாறு விவாகரத்துச் செய்தல் இரண்டு தடவைகளே. (இதன் பிறகு) நல்ல முறையில் சேர்ந்து வாழலாம். அல்லது அழகான முறையில் விட்டுவிடலாம். மனைவியருக்கு நீங்கள் கொடுத்தவற்றிலிருந்து எந்த ஒன்றையும் திரும்பப் பெறுவதற்கு அனுமதி இல்லை. அவ்விருவரும் அல்லாஹ்வின் வரம்புகளை நிலைநாட்ட மாட்டார்கள் என்று அஞ்சினால் தவிர. அவ்விருவரும் அல்லாஹ்வின் வரம்புகளை நிலைநாட்ட மாட்டார்கள் என்று நீங்கள் அஞ்சினால் அவள் (மஹரிலிருந்து) ஈடாகக் கொடுத்து பிரிந்து விடுவது இருவர் மீதும் குற்றமில்லை. இவை அல்லாஹ்வின் வரம்புகள். எனவே அவற்றை மீறாதீர்கள்! அல்லாஹ்வின் வரம்புகளை மீறுவோரே அநீதி இழைத்தவர்கள்.

(இரண்டு தடவை விவாகரத்துச் செய்து சேர்ந்து கொண்ட பின் மூன்றாவது தடவையாக) அவளை அவன் விவாகரத்துச் செய்தால் அவள் வேறு கணவனை மணம் செய்யாத வரை அவனுக்கு அனுமதிக்கப்பட்டவளாக ஆக மாட்டாள். (இரண்டாம் கணவனாகிய) அவனும் அவளை விவாகரத்துச் செய்து, (மீண்டும் முதல் கணவனும் அவளும் ஆகிய) இருவரும் அல்லாஹ்வின் வரம்புகளை நிலைநாட்ட முடியும் எனக் கருதினால் (திருமணத்தின் மூலம்) சேர்ந்து கொள்வது குற்றமில்லை. இவை அல்லாஹ்வின் வரம்புகள். அறிகின்ற சமுதாயத்திற்கு அவன் இதைத் தெளிவுபடுத்துகிறான்.

திருக்குர்ஆன் 2: 229, 230

கர்ப்பிணியாக இருக்கும் நிலையில் தலாக் சொல்லப்பட்டால் பிள்ளையை பெற்றெடுக்கும் வரை கணவன் வீட்டில் இருக்க வேண்டும்..தலாக் சொல்லப்பட்ட பிறகு மூன்றுமாதங்கள் அல்லது பிள்ளைபெறும் வரையில் கணவன் வீட்டில் இருக்கும் மனைவியை கணவன் நல்லமுறை கவனித்து செலவிட வேண்டும்..

உங்கள் வசதிக்கேற்ப அவர்களை நீங்கள் குடியிருக்கும் இடத்தில் குடியமர்த்துங்கள்! அவர்களுக்கு நெருக்கடியை ஏற்படுத்தி அவர்களுக்குத் தீங்கு செய்யாதீர்கள்! அவர்கள் கர்ப்பிணிகளாக இருந்தால் அவர்கள் பிரசவிக்கும் வரை அவர்களுக்காகச் செலவிடுங்கள்! உங்களுக்காக அவர்கள் பாலூட்டினால் அவர்களுக்குரிய கூலிகளை அவர்களுக்கு வழங்கி விடுங்கள்! உங்களுக்கிடையே நல்ல முறையில் (இதுபற்றி) முடிவு செய்து கொள்ளுங்கள்! ஒருவருக்கொருவர் (இதைச்) சிரமமாகக் கருதினால் அவருக்காக இன்னொருத்தி பாலூட்டட்டும்.

திருக்குர்ஆன் 65:6

தனது கருவைதான் மனைவி  சுமக்கிறாள் என்ற நன்றியோடும் கடமையுணர்வோடும் கணவன் நடந்துகொள்வது அவசியம்..

தலாக் சொல்லப்பட்ட பிறகும் மூன்று மாதங்கள் கணவனின் வீட்டிலேயே இருக்க வேண்டும் என மார்க்கம் கட்டளையிடுவதற்கு காரணம் அந்த காலங்களில் கூட அவர்களுக்கு மத்தியில் நல்லிணக்கம் ஏற்படுத்த ஒரு வாய்ப்பாக இருக்கும் என்பதால் தான்..இஸ்லாம் தம்பதியினரிடம் நல்லிணக்கத்தையே விரும்புகிறது.. ஷைத்தான் தான் பிரிவினையை விரும்புகிறான்..

மேலும் தலாக்கிற்கு பிறகு மனைவிக்குரிய இத்தா மற்றும் ஜீவனாம்சம், மற்றும் பெண்களுக்குரிய குலாஃ உரிமைப் பற்றி அடுத்தடுத்த தொடரில் இன்ஷா அல்லாஹ்..